عل ميمر وعل ميمر وعل ميمر...بقلمي جبار الشمري

عل ميمر وعل ميمر وعل ميمر
ظل الوطن ياناس بس يتفجر
ياربي متكلي شنو السوينة
من دون الخلك ليش احنة الأتاذينة
الناس تآكل دوم بمواعينة
من جاع الوطن محد اجاه استنكر
عل ميمر وعل ميمر وعل ميمر
مسلوب نصة ونصة هم يتقشمر
ظلينة مثل ام الضعن ظلينة
شما هجروها صاحت من ادينة
اليعني إلنا صار مايعنينة
الله أكبر عل يفجر كبر
عل ميمر وعل ميمر وعل ميمر
أرض النفط والنفط بيها اتبخر
متروسة قاصات الأحزاب الكبرة
ياخذهة باجر العبادي لكبرة
هل كرش هذا العندة صار شكبرة
والناس ما شافت شكر لا عنبر

بقلمي
جبار الشمري