~♧ زمان هذا !!! ♧~•- بقلم الشاعر الزجال/ منتصر إبراهيم

~♧ زمان هذا !!! ♧~•

حسكة مصديه
مطلية دبل
راس بقوة الجدبة هبل
شلا هضور في هاد الراس تتخبل
تعرمت ؤ ولات بحال الجبل
هاد لهم ما بغا يزول ولا يتبدل

معاه ريقي نشف...
ولا بغا يتبل
لسان مكبل

جوف عامر يسوط
تكول G غير مقراج مسبل

شلا هضور
زواقها طعمة
صوفها مقرشل
ريحتو كافور
ؤ سداها مخبل

صابني الذل
وليت بين عينيهم
غير ميت مجبد ؤ مقبل

إيه يا قلبي!!!
على خلايق ربي...
صنعة
ما هي نحاس ولا جوالق.

بين لملاغة ؤ لمعقول...
ما تقدر تفرق.

حتى خضرة ليوم
بلوانها ؤ شكالها...
ما تعرف واش تخليها ديكور!!!
ؤ لا بيها تمرّق.

بنادم جلق
حل فمو ما بق غلق
نشف منو لعرق
زمان تشق
ما بق فيه ما يتلبّق
زمان كلشي فيه تورق
مول المعقول معيق
شي كاي غرب
ؤ شي كاي شرق
ضاع لحق
ؤ لعيب سبق
الصاحب رجع يغدر ؤ يسرق

ما بق ما تفرق
الشارف بحال الصغير...
رجع يتخرّق

لكبير ينعس
ؤ دري مزال في عينيه يبرق
جيل قصيف
جيل مجبد ؤ مطرّق
جيل مبوق

زمان فيه المعقول
من الشّر هربان معلق
ؤ المسكين عايش في جولق

إيه يا زماني!!!
يجود مول الجود
ؤ رد بالك
راه الصنعة علموها لينا ليهود
وخا ورتناها من لجدود
تاريخنا ما عليه شهود

كلامي كلام
تفوح منو ريحة الجاوي والعود
شحال من بنادم غير مكيود G
الدنيا دوارة...
إيه دوارة
كل واحد جاه في حقو سفود
ؤ المسكين منها مطرود

زردة
ؤ ريحتها فاحت
ما تكول G غير جيفة
بريحة لبطانة ؤ جلود
ؤ مكجكج G عليها الذبان والدود.

- بقلم الشاعر الزجال/ منتصر إبراهيم
- 13 ماي 2016
- مدينة سلا المغرب